مضت الايام وتمضي

                       وليد يلدا

            ليس لشيء نشعر به، بل لانها من تصميم خلق الخالق الكل في العالم يسابق الزمن ويعمل المستحيل ليصبوا للمنال فقط نحن في عراقنا نراوح في مكاننا ونتبادل التهم والتهايم ونقول نحن وبس؟ عمي يا ابو فلان وياابو فلانه ترة تعبنا وصرنا مضحكة للعالم بس كافي بعد فضوها...

لو تنزلون بحلبة للمصارعة ونكعد نتفرج عليكم ونشوف من راح يربح ويعمر العراق لو خلونا وحدنا نحن المكاريد نعمر العراق، لكن ما نريد دم بس كافي دم ترة ما بقى بينا دم وحتى شربت زبيب حجي زبالة خلص شكد ما شربنا منا احنا العراقيين  كل يوم صبح ومن القهر صار بينا الضغط والسكر والحلوة اكوة مرض جديد اسمة خليني دا خليك واني شعلية خلي البلد يحترك؟؟؟ ..ليش يا ناس هذا البلد مو بلدكم وعلى الكل ان يخاف عليه  ..بالله عليكم يا سادتي الكرام شنو احسن منا سكان العالم الغربي الي عبر وفاق بأنجازاته الخيال والاحلام ونحن لحد الان نتباها ونهلهل كلما بلطنا شارع ونظفنا مدينة اهذا ما  يريده الشعب بس؟؟؟ 

خلي يكون مثالنا اليابان بعد الدمار الشامل  الاخيرالذي حصل في ثلثها الجنوبي نتيجة الزلزال وما اعقبه من تسونامي  وبدون حس او كلام او تململ بدوا يلملمون جراحهم بكل هدوء وصبر متحابين وحتى غير مطالبين بالمعونات الخارجية لاعادة ما دمر وخلال فترة قياسية روحوا شوفوا النتيجة !!مو تخبل !!! الانجاز الي صار بيها يمكن لو احنا ما نخلصة بخمسين سنة !!! الامثال تضرب ولا تقاس هذا ما نعرفه في العراق والبلاد العربية... فلوس العراق والحمد لله وفيرة بس هسة هي دتسرح وتمرح مو بالعراق وسنارات المفسدين هم الوحيدون المستفيدين  كلما تبادلوا الادوار والمناصب

همنا نحن العراقيين اصبح هم لو كابوس يابة يا عيني فضوها ترة تعبنا وتعبت اعصابنا نريد نعيش ونربي اولادنا على الحب والخير وحب الوطن والثبات فيه مو ان نخليهم يهاجرون ويتركون بلدهم ويروحون يدورون على وطن اخر جديد!!! وانتم ابقوا وحدكم حلوا مشاكلكم للنهاية وبعدين سونا دعوة لزيارة بلدنا العراق عفوا كان بلدنا لنعيش فيه ضيوف !هذا لوا بقى منا احد عايش او بقى بينا حيل ونكدر نستمر ونعيش وياكم بهذا الوضع الممل كل يوم خبر  اتعس من الاخر يوم الحكومة راح تغير وتتغير وحالنا هو.. هو وانتم يومية بكوكب ما تشوفون بهذلتنا واحتقارنا لارواحنا بكل يوم نعيشه ودنعيشه وياكم ..بس بعد بس!! لو ترحمونا لو خلوا رحمة الله ترحمنا ونخلص. وكان الله يحب الرحماء الانقياء القلب المحسنين المتواضعين والسلام عليكم ورحمته تعالى تشملكم جميعا...